Soos familie. Stedelike huiswerkers in Suid-Afrikaanse tekste na Amsterdam

Sopas het bekend geword dat Ena Jansen se boek Soos familie. Stedelike huiswerkers in Suid-Afrikaanse tekste volgende jaar by die Amsterdamse uitgewer Cossee in Nederland sal verskyn. Die boek van byna seshonderd bladsye word tans vertaal deur Riet de Jong-Goossens, ontvanger van talle pryse vir haar vertaalwerk uit Afrikaans die afgelope vyf en twintig jaar. Toe Riet de Jong enkele jare gelede die Nijhoff-prys, Nederland se belangrikste vertaalprys, ontvang het, het sy die gedeelte van die prysgeld wat bestem moet wees vir ’n vertaalprojek, al gereserveer vir die vertaling van Jansen se boek.

Eva Cossee is JM Coetzee se uitgewer in Nederland. Ander Suid-Afrikaanse boeke wat Cossee uitgegee het is JC Kannemeyer en David Atwell se biografiese werk oor Coetzee, romans van Ingrid Winterbach en die Nederlandse vertaling van Dan Sleigh en Piet Westra se boek Die aanslag op die slaweskip Meermin 1766.

Ena Jansen se boek is in Mei 2015 deur Protea uitgegee met ’n kleurbylaag wat kunswerke deur Marlene Dumas, David Goldblatt, Mary Sibande, Zanele Muholi, Claudette Schreuders, Keith Dietrich en Anton Kannemeyer insluit. Dit sal na verwagting in Junie 2016 reeds in Nederlandse boekwinkels beskikbaar wees. Soos familie is deur Jean Meiring, resensent van Die Burger beskryf as "meesleurend en monumentaal". Die Johannesburgse regsgeleerde was veral onder die indruk van die feit dat die boek dringend tot die generasie Suid-Afrikaners spreek "vir wie die blikbord en dikwels gekraakte beker onder die opwasbak gemeenplaas was". Dit moet ook sekerlik deur jongmense gelees word. Hy beskou die boek as ernstige literêre en sosio-historiese navorsing’ in ’n betoog wat "maklik om te volg en aangrypend" is. Elmari Rautenbach het Soos familie in Rapport beskryf as ‘n skat van verhale oor huiswerkers.

Protea. R200.
Ook as e-boek beskikbaar.

The post Soos familie. Stedelike huiswerkers in Suid-Afrikaanse tekste na Amsterdam appeared first on LitNet.